ਬਜ਼ੁਰਗ ਸਿੱਖ ਉੱਤੇ ਹਮਲੇ ਦੇ ਇਲਜ਼ਾਮ ਵਿੱਚ ਅਮਰੀਕੀ ਪੁਲੀਸ ਮੁਖੀ ਦਾ ‘ਸਪੂਤ’ ਗ੍ਰਿਫ਼ਤਾਰ

ਨਿਊਯਾਰਕ, 9 ਅਗਸਤ (ਸ.ਬ.) ਬੀਤੇ ਦਿਨੀਂ ਕੈਲੇਫ਼ੋਰਨੀਆ ਵਿੱਚ ਬਿਰਧ ਸਿੱਖ ਉਤੇ ਹਮਲਾ ਕਰਨ ਦੇ ਦੋਸ਼ ਵਿੱਚ ਦੋ ਅੱਲ੍ਹੜ ਉਮਰ ਦੇ ਨੌਜਵਾਨ ਬੀਤੇ ਦਿਨੀਂ ਗ੍ਰਿਫ਼ਤਾਰ ਕੀਤੇ ਗਏ| ਇਨ੍ਹਾਂ ਵਿੱਚੋਂ ਇੱਕ ਸ਼ਹਿਰ ਦੇ ਪੁਲੀਸ ਮੁਖੀ ਦਾ ਫ਼ਰਜ਼ੰਦ ਹੈ| ਪੁਲੀਸ ਨੇ ਲੁੱਟ-ਖੋਹ ਦੀਆਂ ਧਾਰਾਵਾਂ ਤਹਿਤ ਦੋਵਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਪਰ ਇਸ ਘਟਨਾ ਦੀ ਨਸਲੀ ਅਪਰਾਧ ਦੇ ਨਜ਼ਰੀਏ ਤੋਂ ਵੀ ਜਾਂਚ ਕੀਤੀ ਜਾ ਰਹੀ ਹੈ|
ਮੁਲਜ਼ਮ ਦੀ ਪਛਾਣ 18 ਸਾਲਾ ਟਾਇਰੌਨ ਮੈਕ ਅਲਿਸਟਰ ਵਜੋਂ ਹੋਈ ਹੈ| ਉਸ ਨਾਲ 16 ਸਾਲਾ ਅੱਲ੍ਹੜ ਉਮਰ ਦੇ ਮੁੰਡੇ ਸਿਰ ਵਾਰਦਾਤ ਵਿੱਚ ਸ਼ਾਮਲ ਹੋਣ ਦੇ ਇਲਜ਼ਾਮ ਹਨ| ਟਾਇਰੌਨ ਯੂਨੀਅਨ ਸਿਟੀ ਪੁਲੀਸ ਚੀਫ਼ ਡੈਰੇਅਲ ਮੈਕ ਅਲਿਸਟਰ ਦਾ ਪੁੱਤ ਹੈ| ਪੁਲੀਸ ਨੇ ਦੋਵਾਂ ਨੂੰ 71 ਸਾਲਾ ਬਜ਼ੁਰਗ ਸਿੱਖ ਸਾਹਿਬ ਸਿੰਘ ਨੱਤ ਉੱਪਰ ਬੀਤੀ ਛੇ ਅਗਸਤ ਨੂੰ ਮੈਨਟੇਕਾ ਸ਼ਹਿਰ ਦੀ ਸੜਕ ਕਿਨਾਰੇ ਹਮਲਾ ਕਰ ਕੇ ਜ਼ਖ਼ਮੀ ਕਰਨ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤਾ ਹੈ| ਦੋਵਾਂ ਉਤੇ ਲੁੱਟ-ਖੋਹ ਕਰਨ, ਵੱਡਿਆਂ ਨਾਲ ਬੁਰਾ ਵਤੀਰਾ ਕਰਨ ਤੇ ਮਾਰੂ ਹਥਿਆਰ ਨਾਲ ਹਮਲਾ ਕਰਨ ਸਬੰਧੀ ਧਾਰਾਵਾਂ ਹੇਠ ਕੇਸ ਦਰਜ ਕੀਤਾ ਗਿਆ ਹੈ|
ਆਪਣੇ ਪੁੱਤਰ ਦਾ ਨਾਂ ਇਸ ਜੁਰਮ ਵਿੱਚ ਆਉਣ ਤੇ ਪੁਲੀਸ ਚੀਫ਼ ਮੈਕ ਐਲਿਸਟਰ ਨੇ ਫੇਸਬੁੱਕ ਉਤੇ ਸ਼ਰਮਿੰਦਗੀ ਮਹਿਸੂਸ ਕੀਤੀ ਹੈ| ਉਨ੍ਹਾਂ ਲਿਖਿਆ ਕਿ ਉਨ੍ਹਾਂ ਦਾ ਪੁੱਤਰ ਪਰਿਵਾਰ ਤੋਂ ਲੰਮੇ ਸਮੇਂ ਤੋਂ ਦੂਰ ਹੋ ਚੁੱਕਿਆ ਹੈ| ਉਨ੍ਹਾਂ ਕਿਹਾ ਕਿ ਉਹ ਸ਼ਬਦਾਂ ਵਿੱਚ ਨਹੀਂ ਬਿਆਨ ਕਰ ਸਕਦੇ ਕਿ ਇਸ ਸਭ ਨੇ ਉਨ੍ਹਾਂ ਦੀ ਪਤਨੀ, ਧੀਆਂ ਤੇ ਉਨ੍ਹਾਂ ਖ਼ੁਦ ਨੂੰ ਕਿੰਨਾ ਸ਼ਰਮਿੰਦਾ ਕੀਤਾ ਹੈ| ਉਨ੍ਹਾਂ ਲਿਖਿਆ ਕਿ ਉਨ੍ਹਾਂ ਦੇ ਪੁੱਤਰ ਦੀ ਇਸ ਹਮਲੇ ਵਿੱਚ ਸ਼ਮੂਲੀਅਤ ਦਾ ਪਤਾ ਲੱਗਣ ਤੋਂ ਬਾਅਦ ਉਨ੍ਹਾਂ ਦੇ ਢਿੱਡ ਵਿੱਚ ਦਰਦ ਹੋ ਰਿਹਾ ਹੈ|
ਜ਼ਿਕਰਯੋਗ ਹੈ ਕਿ ਬੀਤੀ 6 ਅਗਸਤ ਨੂੰ ਮੈਨਟੇਕਾ ਸ਼ਹਿਰ ਦੀ ਇੱਕ ਸੜਕ ਕੰਢੇ ਦੋ ਨੌਜਵਾਨਾਂ ਨੇ 71 ਸਾਲਾ ਸਾਹਿਬ ਸਿੰਘ ਨੱਤ ਨੂੰ ਘੇਰਿਆ ਤੇ ਉਨ੍ਹਾਂ ਦੇ ਢਿੱਡ ਵਿੱਚ ਲੱਤਾਂ ਨਾਲ ਕਈ ਵਾਰ ਕੀਤੇ| ਹਮਲਾਵਰ ਨੇ ਨੱਤ ਨਾਲ ਬੁਰੀ ਤਰ੍ਹਾਂ ਕੁੱਟਮਾਰ ਕੀਤੀ ਤੇ ਉਨ੍ਹਾਂ ਦੀ ਦਸਤਾਰ ਉਤਾਰ ਦਿੱਤੀ| ਇੰਨਾ ਹੀ ਨਹੀਂ ਉਹ ਜਾਂਦਾ ਹੋਇਆ ਬਜ਼ੁਰਗ ਸਿੱਖ ਉਤੇ ਥੁੱਕ ਵੀ ਗਿਆ| ਇਸ ਤੋਂ ਪਹਿਲਾਂ 31 ਜੁਲਾਈ ਨੂੰ 50 ਸਾਲਾ ਸੁਰਜੀਤ ਸਿੰਘ ਮੱਲ੍ਹੀ ਤੇ ਵੀ ਹਮਲਾ ਹੋਇਆ ਸੀ| ਇੱਕ ਹਫ਼ਤੇ ਦੌਰਾਨ ਦੋ ਸਿੱਖਾਂ ਉਤੇ ਹਮਲੇ ਹੋਣ ਨਾਲ ਭਾਈਚਾਰੇ ਵਿੱਚ ਕਾਫੀ ਰੋਸ ਪਾਇਆ ਜਾ ਰਿਹਾ ਹੈ|

Leave a Reply

Your email address will not be published. Required fields are marked *