ਏਸ਼ੀਆਈ ਅਦਾਕਾਰਾਂ ਦੀ ਸੂਚੀ ਪਿੱਛੇ ਲੁਕੇ ਅਰਥ ਨੂੰ ਸਮਝਣ ਦੀ ਲੋੜ

ਆਸਕਰ ਪੁਰਸਕਾਰਾਂ ਤੋਂ ਠੀਕ ਪਹਿਲਾਂ ਇੱਕ ਪ੍ਰਸਿੱਧ ਅਮਰੀਕੀ ਨਿਊਜ ਚੈਨਲ ਨਾਲ ਜੁੜੀ ਵੈਬਸਾਈਟ ਤੇ ਪੱਚੀ ਮਹਾਨ ਏਸ਼ੀਆਈ ਅਭਿਨੇਤਾ- ਅਭਿਨੇਤਰੀਆਂ ਦੀ ਸੂਚੀ ਜਾਰੀ ਹੋਈ ਹੈ। ਸਾਈਟ ਦੇ ਅਨੁਸਾਰ ਇਸ ਦਾ ਮਕਸਦ ਅਕੈਡਮੀ ਪੁਰਸਕਾਰਾਂ ਵਿੱਚ ਏਸ਼ੀਆਈ ਐਕਟਿੰਗ ਟੈਲੰਟ ਦੀ ਅਣਦੇਖੀ ਦੀ ਭਰਭਾਈ ਕਰਨਾ ਹੈ। ਹੁਣ ਤੱਕ ਸਰਵੋਤਮ ਅਭਿਨੇਤਾ ਜਾਂ ਅਭਿਨੇਤਰੀ ਦਾ ਆਸਕਰ ਸਿਰਫ ਦੋ ਏਸ਼ੀਆਈ ਹੀ ਲੈ ਸਕੇ ਹਨ, ਪਰ ਇੱਥੇ ਇਹ ਸੂਚੀ ਛਾਪ ਕੇ ਦੱਸਿਆ ਗਿਆ ਹੈ ਕਿ ਏਸ਼ੀਆ ਵਿੱਚ ਅਭਿਨੈ ਪ੍ਰਤਿਭਾਵਾਂ ਦਾ ਕੋਈ ਟੋਟਾ ਨਹੀਂ ਹੈ। ਭਾਰਤ ਵਿੱਚ ਲੋਕ ਇਹ ਸੋਚ ਕੇ ਖੁਸ਼ ਹਨ ਕਿ ਸੂਚੀ ਦੇ ਕੁਲ ਪੱਚੀ ਨਾਮਾਂ ਵਿੱਚ ਪੰਜ ਮਤਲਬ ਵੀਹ ਫੀਸਦੀ ਇਕੱਲੇ ਮੁੰਬਈ ਹਿੰਦੀ ਫਿਲਮ ਇੰਡਸਟਰੀ ਨਾਲ ਜੁੜੇ ਹੋਏ ਹਨ।
ਇਹ ਪੰਜ ਨਾਮ ਗੁਰੁਦੱਤ, ਨਰਗਿਸ, ਪ੍ਰਾਣ, ਮੀਨਾ ਕੁਮਾਰੀ ਅਤੇ ਅਮਿਤਾਭ ਬੱਚਨ ਦੇ ਹਨ। ਜਿੱਥੋਂ ਤੱਕ ਸਵਾਲ ਅਭਿਨੈ ਦੀਆਂ ਉਚਾਈਆਂ ਦਾ ਹੈ ਤਾਂ ਇਨ੍ਹਾਂ ਪੰਜਾਂ ਤੇ ਭਾਰਤ ਵਿੱਚ ਸ਼ਾਇਦ ਹੀ ਕੋਈ ਵਿਵਾਦ ਹੋਵੇ, ਪਰ ਗੱਲ ਜੇਕਰ ਇਸ ਸੂਚੀ ਦੀ ਗੁਣਵਤਾ ਦੀ ਹੋਵੇ ਤਾਂ ਇਹ ਪੂਰੀ ਤਰ੍ਹਾਂ ਬਕਵਾਸ ਲੱਗਦੀ ਹੈ। ਗੱਲ ਗੱਲ ਤੇ ਸੂਚੀ ਬਣਾਉਣ ਦੌੜ ਪੈਣ ਵਾਲੇ ਅਮਰੀਕੀਆਂ ਨੇ ਸ਼ਾਇਦ ਕੂਟਨੀਤਿਕ ਪੂਰਵਾਗ੍ਰਿਹਾਂ ਦੇ ਚਲਦੇ ਇਸ ਵਿੱਚ ਇੱਕ ਵੀ ਇਰਾਨੀ ਨਾਮ ਨਹੀਂ ਰੱਖਿਆ, ਜਦੋਂਕਿ ਇਰਾਨੀ ਫਿਲਮਕਾਰਾਂ ਅਤੇ ਅਭਿਨੇਤਾਵਾਂ ਨੇ ਦੁਨੀਆਂ ਨੂੰ ਕੁਝ ਸਭਤੋਂ ਸੰਵੇਦਨਸ਼ੀਲ ਅਤੇ ਕਲਾਤਮਕ ਫਿਲਮਾਂ ਦਿੱਤੀਆਂ ਹਨ।
ਭਾਰਤ ਦੀਆਂ ਹੀ ਗੈਰ ਮੁੰਬਈਆ ਫਿਲਮਾਂ ਦੀ ਅਣਦੇਖੀ ਹਮੇਸ਼ਾ ਤੋਂ ਪੱਛਮੀ ਪਾਪੂਲਰ ਸਿਨੇ ਆਲੋਚਕਾਂ ਦੀ ਸੀਮਾ ਦਿਖਾਉਂਦੀ ਰਹੀ ਹੈ। ਇਸ ਸੂਚੀ ਵਿੱਚ ਇਹ ਸੀਮਾ ਕੁਝ ਜ਼ਿਆਦਾ ਹੀ ਜਾਹਿਰ ਹੋ ਰਹੀ ਹੈ ਕਿਉਂਕਿ ਲਿਸਟ ਬਣਾਉਣ ਵਾਲਿਆਂ ਨੂੰ ਭਾਰਤ ਦੇ ਗੈਰਮੁੰਬਈਆ ਅਭਿਨੇਤਾ ਅਭਿਨੇਤਰੀਆਂ ਦੇ ਸ਼ਾਇਦ ਨਾਮ ਹੀ ਨਹੀਂ ਪਤਾ ਹਨ। ਸਭਤੋਂ ਵੱਡਾ ਘਪਲਾ ਖੁਦ ਇਸ ਸੂਚੀ ਵਿੱਚ ਮੌਜੂਦ ਪੰਜ ਭਾਰਤੀ ਨਾਮਾਂ ਵਿੱਚ ਦੇਖਿਆ ਜਾ ਸਕਦਾ ਹੈ। ਇਨ੍ਹਾਂ ਨਾਲ ਕੁਝ ਅਜਿਹਾ ਮਹਿਸੂਸ ਹੁੰਦਾ ਹੈ ਕਿ ਜਿਵੇਂ ਮੁੰਬਈ ਫਿਲਮ ਇੰਡਸਟਰੀ ਜਾਂ ਤਾਂ ਕਾਫੀ ਪਹਿਲਾ ਮਰ ਚੁੱਕੀ ਹੋਵੇ, ਜਾਂ ਜਲਦ ਹੀ ਮਰਨ ਵਾਲੀ ਹੋਵੇ।
ਸੂਚੀ ਵਿੱਚ ਸਿਰਫ ਇੱਕ ਜਿਊਂਦੇ ਅਭਿਨੇਤਾ ਅਮਿਤਾਭ ਬਚਨ ਦਾ ਨਾਮ ਮੌਜੂਦ ਹੈ, ਜਦੋਂਕਿ ਚੀਨ, ਹਾਂਗਕਾਂਗ, ਸਿੰਗਾਪੁਰ, ਕੋਰੀਆ ਅਤੇ ਥਾਈਲੈਂਡ ਦੇ ਜਿਨ੍ਹਾਂ ਅਭਿਨੇਤਾ ਅਭਿਨੇਤਰੀਆਂ ਦਾ ਨਾਮ ਇਸ ਵਿੱਚ ਹੈ, ਉਨ੍ਹਾਂ ਵਿੱਚ ਜ਼ਿਆਦਾ ਹੁਣ ਆਪਣੇ ਇੱਥੋਂ ਦੀਆਂ ਫਿਲਮਾਂ ਵਿੱਚ ਨਾ ਸਿਰਫ ਸਰਗਰਮ ਹਨ, ਬਲਕਿ ਲੀਡ ਰੋਲ ਵਿੱਚ ਆਉਂਦੇ ਹਨ। ਇਸ ਦਾ ਮੁੱਖ ਕਾਰਨ ਸ਼ਾਇਦ ਇਹ ਹੋਵੇ ਕਿ ਇਨ੍ਹਾਂ ਦੇਸ਼ਾਂ ਦੀਆਂ ਕੁਝ ਫਿਲਮਾਂ ਅਤੇ ਉਨ੍ਹਾਂ ਦੇ ਕਈ ਅਭਿਨੇਤਾ ਅਭਿਨੇਤਰੀਆਂ ਹਾਲੀਵੁਡ ਦੀ ਨਜਰ ਵਿੱਚ ਮੁੱਖ ਸਿਨੇਮਾ ਦਾ ਹਿੱਸਾ ਬਣ ਚੁੱਕੇ ਹਨ, ਜਦੋਂਕਿ ਮੁੰਬਈ ਹਿੰਦੀ ਸਿਨੇਮਾ ਆਪਣੀ ਬਿਲਕੁਲ ਅਲੱਗ, ਗੈਰ ਹਾਲੀਵੁਡ ਪਹਿਚਾਣ ਦੇ ਨਾਲ ਅੰਤਰਰਾਸ਼ਟਰੀ ਬਾਜਾਰ ਵਿੱਚ ਥਾਂ ਬਣਾ ਰਿਹਾ ਹੈ ਅਤੇ ਇਸ ਦੀ ਭੂਮਿਕਾ ਹਾਲੀਵੁਡ ਲਈ ਕੰਪਟੀਟਰ ਵਰਗੀ ਹੈ।
ਨੂੰਸੈਕਸ, ਹਿੰਸਾ ਅਤੇ ਐਨੀਮੇਸ਼ਨ ਦੇ ਸੈਟ ਫਾਰਮੂਲੇ ਨਾਲ ਗਲੋਬਲਾਈਜਡ ਦੁਨੀਆਂ ਦੇ ਚੱਪੇ ਚੱਪੇ ਤੇ ਆਪਣੇ ਝੰਡੇ ਗੱਡ ਚੁੱਕੇ ਹਾਲੀਵੁਡ ਨੂੰ ਸਹਿਜ ਇਨਸਾਨੀ ਕਹਾਣੀਆਂ ਦੇ ਦਾਇਰੇ ਵਿੱਚ ਚੁਣੌਤੀ ਆਉਣ ਵਾਲੇ ਦਿਨਾਂ ਵਿੱਚ ਸਿਰਫ ਅਤੇ ਸਿਰਫ ਭਾਰਤੀ ਅਤੇ ਸ਼ਾਇਦ ਕੁਝ ਹੱਦ ਤੱਕ ਚੀਨੀ ਸਿਨੇਮਾ ਤੋਂ ਹੀ ਮਿਲਣ ਵਾਲੀ ਹੈ, ਲਿਹਾਜਾ ਆਉਣ ਵਾਲੇ ਸਮੇਂ ਵਿੱਚ ਅਜਿਹੀਆਂ ਸੂਚੀਆਂ ਨੂੰ ਰਣਨੀਤਿਕ ਨਜਰ ਨਾਲ ਵੀ ਦੇਖਣ ਦੀ ਆਦਤ ਸਾਨੂੰ ਪਾਉਣੀ ਪਵੇਗੀ।