ਟੈਰਰ ਫੰਡਿੰਗ ਮਾਮਲਾ: ਐਨ. ਆਈ. ਏ. ਵਲੋਂ 11 ਸੂਬਿਆਂ ਵਿੱਚ ਛਾਪੇਮਾਰੀ, 100 ਦੇ ਕਰੀਬ ਸ਼ੱਕੀ ਗ੍ਰਿਫ਼ਤਾਰ

ਨਵੀਂ ਦਿੱਲੀ, 22 ਸਤੰਬਰ (ਸ.ਬ.) ਰਾਸ਼ਟਰੀ ਜਾਂਚ ਏਜੰਸੀ (ਐਨ . ਆਈ. ਏ.) ਦੀ ਅਗਵਾਈ ਵਿੱਚ ਕਈ ਏਜੰਸੀਆਂ ਨੇ ਅੱਜ ਸਵੇਰੇ 11 ਸੂਬਿਆਂ ਵਿੱਚ ਟੈਰਰ ਫੰਡਿੰਗ ਮਾਮਲੇ ਵਿੱਚ ਸ਼ਾਮਲ ਸ਼ੱਕੀਆਂ ਦੇ ਟਿਕਾਣਿਆਂ ਤੇ ਛਾਪੇਮਾਰੀ ਕੀਤੀ ਅਤੇ ਪਾਪੁਲਰ ਫਰੰਟ ਆਫ਼ ਇੰਡੀਆ (ਪੀ ਐਫ ਆਈ) ਦੇ ਘੱਟੋ-ਘੱਟ 106 ਵਰਕਰਾਂ ਨੂੰ ਗ੍ਰਿਫ਼ਤਾਰ ਕੀਤਾ। ਅਧਿਕਾਰੀਆਂ ਨੇ ਦੱਸਿਆ ਕਿ ਸਭ ਤੋਂ ਵੱਧ ਗ੍ਰਿਫ਼ਤਾਰੀਆਂ ਕੇਰਲ (22), ਮਹਾਰਾਸ਼ਟਰ (20), ਕਰਨਾਟਕ (20), ਆਂਧਰਾ ਪ੍ਰਦੇਸ਼ (5), ਆਸਾਮ (9), ਦਿੱਲੀ (3), ਮੱਧ ਪ੍ਰਦੇਸ਼ (4), ਪੁਡੂਚੇਰੀ (3), ਤਾਮਿਲਨਾਡੂ (10), ਉੱਤਰ ਪ੍ਰਦੇਸ਼ (8) ਅਤੇ ਰਾਜਸਥਾਨ (2) ਵਿੱਚ ਕੀਤੀਆਂ ਗਈਆਂ।

ਐਨ. ਆਈ. ਏ. ਨੇ ਇਸ ਨੂੰ ਹੁਣ ਤੱਕ ਦੀ ਸਭ ਤੋਂ ਵੱਡੀ ਜਾਂਚ ਕਾਰਵਾਈ ਕਰਾਰ ਦਿੱਤਾ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਐਨ. ਆਈ. ਏ. ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈਡੀ) ਅਤੇ 11 ਸੂਬਿਆਂ ਦੇ ਪੁਲੀਸ ਬਲਾਂ ਵਲੋਂ ਗ੍ਰਿਫ਼ਤਾਰੀਆਂ ਕੀਤੀਆਂ ਹਨ।

ਅਧਿਕਾਰੀਆਂ ਮੁਤਾਬਕ ਅੱਤਵਾਦੀਆਂ ਨੂੰ ਧਨ ਮੁਹੱਈਆ ਕਰਾਉਣ, ਉਨ੍ਹਾਂ ਲਈ ਸਿਖਲਾਈ ਦਾ ਪ੍ਰਬੰਧ ਕਰਨ ਅਤੇ ਪਾਬੰਦੀਸ਼ੁਦਾ ਸੰਗਠਨਾਂ ਵਿੱਚ ਸ਼ਾਮਲ ਹੋਣ ਲਈ ਲੋਕਾਂ ਨੂੰ ਭਰਮਾਉਣ ਵਿੱਚ ਸ਼ਾਮਲ ਉਨ੍ਹਾਂ ਟਿਕਾਣਿਆਂ ਤੇ ਛਾਪੇ ਮਾਰੇ ਜਾ ਰਹੇ ਹਨ।

ਪੀ ਐਫ ਆਈ ਨੇ ਇਕ ਬਿਆਨ ਜਾਰੀ ਕਰ ਕੇ ਕਿਹਾ ਕਿ ਪੀ ਐਫ ਆਈ ਦੇ ਰਾਸ਼ਟਰੀ, ਸੂਬਾ ਪੱਧਰੀ ਅਤੇ ਸਥਾਨਕ ਨੇਤਾਵਾਂ ਦੇ ਟਿਕਾਣਿਆਂ ਤੇ ਛਾਪੇ ਮਾਰੇ ਜਾ ਰਹੇ ਹਨ। ਸੂਬਾ ਕਮੇਟੀ ਦੇ ਦਫ਼ਤਰ ਦੀ ਵੀ ਤਲਾਸ਼ੀ ਲਈ ਜਾ ਰਹੀ ਹੈ।

ਅਸੀਂ ਫਾਸੀਵਾਦੀ ਸ਼ਾਸਨ ਵਲੋਂ ਅਸੰਤੋਸ਼ ਦੀ ਆਵਾਜ਼ ਨੂੰ ਦਬਾਉਣ ਲਈ ਏਜੰਸੀਆਂ ਦੀ ਦੁਰਵਰਤੋਂ ਦਾ ਸਖ਼ਤ ਵਿਰੋਧ ਕਰਦੇ ਹਾਂ।

!