ਐਸ ਏ ਐਸ ਨਗਰ, 13 ਨਵੰਬਰ (ਸ.ਬ.) ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ ਪ੍ਰਕਾਸ਼ ਪੁਰਬ ਨੂੰ ਸਮਰਪਿਤ ਦਸਤਾਰਾਂ ਦਾ ਲੰਗਰ 15 ਨਵੰਬਰ ਨੂੰ ਇਤਿਹਾਸਿਕ ਗੁਰਦੁਆਰਾ ਅੰਬ ਸਾਹਿਬ ਵਿਖੇ ਯੂਥ ਅਕਾਲ਼ੀ ਦਲ ਦੇ ਜਿਲਾ ਸ਼ਹਿਰੀ ਪ੍ਰਧਾਨ ਤਰਨਪ੍ਰੀਤ ਸਿੰਘ ਧਾਲੀਵਾਲ ਦੀ ਅਗਵਾਈ ਹੇਠ ਸਵੇਰੇ 10 ਤੋਂ ਦੁਪਹਿਰ 2 ਵਜੇ ਤੱਕ ਲਗਾਇਆ ਜਾਵੇਗਾ।

ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਖੁਸ਼ਇੰਦਰ ਸਿੰਘ ਸੋਹਾਣਾ ਨੇ ਦੱਸਿਆ ਕਿ ਇਸ ਮੌਕੇ ਸ਼੍ਰੋਮਣੀ ਅਕਾਲੀ ਦਲ ਹਲਕਾ ਮੁਹਾਲੀ ਦੇ ਮੁੱਖ ਸੇਵਾਦਾਰ ਪਰਵਿੰਦਰ ਸਿੰਘ ਸੋਹਾਣਾ ਮੁੱਖ ਮਹਿਮਾਨ ਦੇ ਤੌਰ ਤੇ ਸ਼ਾਮਲ ਹੋਣਗੇ ।

ਉਹਨਾਂ ਦੱਸਿਆ ਕਿ ਦਸਤਾਰਾਂ ਦਾ ਇਹ ਲੰਗਰ ਯੂਥ ਅਕਾਲੀ ਦਲ ਦੇ ਪ੍ਰਧਾਨ ਸਰਬਜੀਤ ਸਿੰਘ ਝਿੰਜਰ ਵੱਲੋਂ ਆਰੰਭ ਕੀਤੀ ਮੇਰੀ ਦਸਤਾਰ ਮੇਰੀ ਸ਼ਾਨ ਮੁਹਿੰਮ ਦੇ ਤਹਿਤ ਲਗਾਇਆ ਜਾ ਰਿਹਾ ਹੈ, ਤਾਂ ਜੋ ਨੌਜਵਾਨਾਂ ਵਿੱਚ ਦਸਤਾਰ ਬੰਨਣ ਸਬੰਧੀ ਚੇਤੰਨਤਾ ਲਿਆਂਦੀ ਜਾ ਸਕੇ ਅਤੇ ਉਹਨਾਂ ਨੂੰ ਆਪਣੀ ਕੌਮੀ ਪਛਾਣ ਨਾਲ ਜੋੜਿਆ ਜਾ ਸਕੇ। ਇਸ ਮੌਕੇ ਯੂਥ ਅਕਾਲੀ ਦਲ ਦੇ ਜਿਲਾ ਜਰਨਲ ਸਕੱਤਰ ਜਸਕਰਨ ਸਿੰਘ ਸੋਮਲ, ਮੀਤ ਪ੍ਰਧਾਨ ਰਮਨ ਅਰੋੜਾ ਅਤੇ ਜਸਪ੍ਰੀਤ ਸਿੰਘ ਸੋਹਲ ਵੀ ਹਾਜ਼ਰ ਸਨ।

ਐਸ ਏ ਐਸ ਨਗਰ, 13 ਨਵੰਬਰ (ਸ.ਬ.) ਲਾਰੈਂਸ ਪਬਲਿਕ ਸਕੂਲ, ਸੈਕਟਰ 51, ਮੁਹਾਲੀ ਦੇ ਵਿਦਿਆਰਥੀਆਂ ਨੇ ਹਾਲ ਹੀ ਵਿੱਚ ਵੱਖ ਵੱਖ ਰਾਜ-ਪੱਧਰੀ ਖੇਡ ਮੁਕਾਬਲਿਆਂ ਵਿੱਚ ਬਿਹਤਰੀਨ ਪ੍ਰਦਰਸ਼ਨ ਕਰਦੇ ਹੋਏ ਵੱਖ-ਵੱਖ ਮੈਡਲ ਜਿੱਤੇ ਹਨ।

ਸਕੂਲ ਦੇ ਬੁਲਾਰੇ ਨੇ ਦੱਸਿਆ ਕਿ ਛੇਵੀਂ ਕਲਾਸ ਦੀ ਅਕਾਲ ਜੋਤ ਕੌਰ ਨੇ ਜਲੰਧਰ ਵਿਖੇ ਹੋਏ ਇੰਟਰ-ਸਕੂਲ ਕਰਾਟੇ ਸਟੇਟ ਚੈਂਪੀਅਨਸ਼ਿਪ ਵਿਚ ਸੋਨੇ ਦਾ ਮੈਡਲ ਜਿੱਤਿਆ ਹੈ ਅਤੇ ਨੌਵੀਂ ਕਲਾਸ ਦੀ ਬੈਰੀਨ ਸ਼ਰਮਾ ਨੇ ਲੁਧਿਆਣਾ ਵਿਖੇ ਆਰ. ਐੱਸ. ਐਫ. ਆਈ ਸਟੇਟ ਸਕੇਟਿੰਗ ਚੈਂਪੀਅਨਸ਼ਿਪ ਵਿਚ ਸੋਨੇ ਦਾ ਮੈਡਲ ਜਿੱਤਿਆ ਹੈ।

ਉਹਨਾਂ ਦੱਸਿਆ ਕਿ ਅੱਠਵੀਂ ਕਲਾਸ ਦੀ ਭਾਵਿਆ ਕੰਬੋਜ ਨੇ ਲੁਧਿਆਣਾ ਅਤੇ ਸੰਗਰੂਰ ਵਿਖੇ ਆਯੋਜਿਤ ਆਰ ਐੱਸ ਐਫ ਆਈ ਸਟੇਟ ਅਤੇ ਸਕੂਲ ਸਟੇਟ ਸਕੇਟਿੰਗ ਚੈਂਪੀਅਨਸ਼ਿਪ ਵਿਚ ਤਿੰਨ ਸੋਨੇ ਦੇ ਮੈਡਲ ਜਿੱਤ ਕੇ ਸਕੇਟਿੰਗ ਵਿਚ ਆਪਣਾ ਬਿਹਤਰੀਨ ਪ੍ਰਦਰਸ਼ਨ ਕੀਤਾ। ਸੱਤਵੀਂ ਕਲਾਸ ਦੇ ਤੇਜਸ ਮਿਸ਼ਰਾ ਨੇ ਚੰਡੀਗੜ੍ਹ ਵਿਖੇ ਆਰ ਐੱਸ ਐਫ ਆਈ ਸਟੇਟ ਚੈਂਪੀਅਨਸ਼ਿਪ ਵਿਚ ਸੋਨੇ ਦਾ ਮੈਡਲ ਜਿੱਤਿਆ ਅਤੇ ਸੰਗਰੂਰ ਵਿਖੇ ਸਕੂਲ ਸਟੇਟ ਸਕੇਟਿੰਗ ਚੈਂਪੀਅਨਸ਼ਿਪ ਵਿਚ ਚਾਂਦੀ ਦਾ ਮੈਡਲ ਹਾਸਲ ਕੀਤਾ।

ਇਸੇ ਤਰ੍ਹਾਂ ਏਕਮਜੋਤ ਕੌਰ ਨੇ ਹੈਂਡਬਾਲ ਜ਼ਿਲ੍ਹਾ ਮੁਕਾਬਲੇ ਵਿਚ ਚਾਂਦੀ ਦਾ ਮੈਡਲ ਜਿੱਤਿਆ। ਨੌਵੀਂ ਕਲਾਸ ਦੇ ਆਰਵ ਨੇ ਜਲੰਧਰ ਵਿਚ ਇੰਟਰ-ਸਕੂਲ ਤਾਈਕਵਾਂਡੋ ਸਟੇਟ ਚੈਂਪੀਅਨਸ਼ਿਪ ਵਿਚ ਕਾਂਸੀ ਦਾ ਮੈਡਲ ਹਾਸਲ ਕੀਤਾ। ਦਸਵੀਂ ਕਲਾਸ ਦੇ ਯੁਵਰਾਜ ਸਿੰਘ ਨੇ ਲੁਧਿਆਣਾ ਵਿਚ ਖੇਡਾਂ ਵਤਨ ਪੰਜਾਬ ਸਟੇਟ ਗੇਮਜ਼ ਵਿਚ ਕਿੱਕ ਬਾਕਸਿੰਗ ਵਿਚ ਕਾਂਸੀ ਦਾ ਮੈਡਲ ਜਿੱਤਿਆ।

ਸਕੂਲ ਦੀ ਪ੍ਰਿੰਸੀਪਲ, ਵੀਨਾ ਮਲਹੋਤਰਾ ਨੇ ਕਿਹਾ ਕਿ ਵਿਦਿਆਰਥੀਆਂ ਦੀਆਂ ਇਹ ਪ੍ਰਾਪਤੀਆਂ ਉਹਨਾਂ ਦੀ ਮਿਹਨਤ ਅਤੇ ਸਮਰਪਣ ਨੂੰ ਦਰਸਾਉਂਦੀਆਂ ਹਨ। ਉਨ੍ਹਾਂ ਅੱਗੇ ਕਿਹਾ ਕਿ ਸਕੂਲ ਦੇ ਵਿਦਿਆਰਥੀ ਜਿਸ ਤਰ੍ਹਾਂ ਵੱਖ-ਵੱਖ ਖੇਡਾਂ ਵਿੱਚ ਰਾਜ ਪੱਧਰ ਤੇ ਆਪਣੀ ਪ੍ਰਤਿਭਾ ਦਾ ਪ੍ਰਦਰਸ਼ਨ ਕਰ ਰਹੇ ਹਨ ਅਤੇ ਸਕੂਲ ਦਾ ਨਾਮ ਵੀ ਰੌਸ਼ਨ ਕਰ ਰਹੇ ਹਨ।

ਐਸ ਏ ਐਸ ਨਗਰ, 13 ਨਵੰਬਰ (ਸ.ਬ.) ਮੁਹਾਲੀ ਦੇ ਉਦਯੋਗਿਕ ਏਰਿਆ ਫੇਜ਼ 9 (ਨਜ਼ਦੀਕ ਰੇਲਵੇ ਸਟੇਸ਼ਨ) ਵਿੱਚ ਸਥਿਤ ਭਗਵਾਨ ਸ਼੍ਰੀ ਪਰਸ਼ੁਰਾਮ ਮੰਦਿਰ ਅਤੇ ਧਰਮਸ਼ਾਲਾ ਵਿੱਚ ਭਗਵਾਨ ਸ਼ਾਲਗਰਾਮ ਅਤੇ ਤੁਲਸੀ ਜੀ ਦਾ ਵਿਆਹ ਸਮਾਗਮ ਸ਼ਰਧਾ ਪੂਰਵਕ ਮਨਾਇਆ ਗਿਆ। ਮੰਦਿਰ ਵਿੱਚ ਆਯੋਜਿਤ ਇਸ ਪ੍ਰੋਗਰਾਮ ਦੌਰਾਨ ਪੂਰੇ ਵਿਧੀ ਵਿਧਾਨ ਨਾਲ ਭਗਵਾਨ ਸ਼ਾਲਗਰਾਮ ਅਤੇ ਤੁਲਸੀ ਜੀ ਦੇ ਵਿਆਹ ਦੀ ਰਸਮ ਨਿਭਾਈ ਗਈ। ਇਸ ਮੌਕੇ ਮੰਦਿਰ ਕਮੇਟੀ ਅਹੁਦੇਦਾਰਾਂ ਅਤੇ ਭਾਰੀ ਗਿਣਤੀ ਵਿੱਚ ਸ਼ਰਧਾਲੂਆਂ ਵਲੋਂ ਸ਼ਮੂਲੀਅਤ ਕੀਤੀ ਗਈ।

ਇਸ ਮੌਕੇ ਮੰਦਿਰ ਦੇ ਮੁੱਖ ਸੇਵਾਦਾਰ ਵੀਕੇ ਵੈਦ, ਪ੍ਰਧਾਨ ਜਸਵਿੰਦਰ ਸ਼ਰਮਾ ਅਤੇ ਮਹਿਲਾ ਮੰਡਲ ਦੀ ਪ੍ਰਧਾਨ ਹੇਮਾ ਗੈਰੋਲਾ ਨੇ ਦੱਸਿਆ ਕਿ ਤੁਲਸੀ ਵਿਆਹ ਅਤੇ ਦੇਵਉਠਨੀ ਇਕਾਦਸ਼ੀ ਦੇ ਚਲਦੇ ਅਜੋਕੇ ਦਿਨ ਬ੍ਰਹਮਚਾਰੀ ਮਾਤਾ ਤੁਲਸੀ ਦਾ ਵਿਆਹ ਭਗਵਾਨ ਸ਼ਾਲਗਰਾਮ ਨਾਲ ਕਰਾਉਂਦੇ ਹਨ।

ਇਸ ਮੌਕੇ ਗੋਪਾਲ ਕ੍ਰਿਸ਼ਣ ਸ਼ਰਮਾ, ਸ਼ਿਵ ਸਰਨ ਕੁਮਾਰ, ਜੈ ਕ੍ਰਿਸ਼ਣ ਸ਼ਰਮਾ, ਠਾਕੁਰ ਬ੍ਰਿਜ ਮੋਹਨ ਸ਼ਮਾਰ, ਮਨਮੋਹਣ ਦਾਦਾ, ਜੋਗਿੰਦਰ ਪਾਲ, ਲਕਸ਼ਮੀ ਨਰਾਇਣ, ਤਰਿਵੇਸ਼ ਦਾਦਾ, ਸੁਖਵਿੰਦਰ ਦੱਤ, ਪਰਮਿੰਦਰ ਦੱਤ, ਸ਼੍ਰੀਮਤੀ ਪੂਨਮ, ਲੀਲਾ, ਸੁਰਿੰਦਰ ਸ਼ਰਮਾ, ਮਮਤਾ, ਮੱਲਿਆ, ਸ਼ਸ਼ੀ ਸ਼ਰਮਾ, ਸ਼ਸ਼ੀ ਦਾਦਾ, ਓਮ ਪ੍ਰਕਾਸ਼, ਮਹਿਲਾ ਮੰਡਲ ਦੀ ਸਮੁੱਚੀ ਟੀਮ, ਸ਼੍ਰੀਮਤੀ ਸੁਧਾ, ਸ਼੍ਰੀਮਤੀ ਬੰਦਨਾ, ਸੁਮਨ, ਪਰਮਜੀਤ, ਪੀ ਟੀ ਪਰਵੇਸ਼, ਹਨੀਤ, ਉਮੇਸ਼ ਦਾਦਾ, ਪੁਨਿਤ ਦਾਦਾ, ਦੀਪਕ ਦਾਦਾ ਸਹਿਤ ਸ਼੍ਰੀਮਤੀ ਜੈਵੰਤੀ ਦੇ ਇਲਾਵਾ ਭਾਰੀ ਗਿਣਤੀ ਵਿੱਚ ਮਹਿਲਾ ਮੰਡਲੀ ਅਹੁਦੇਦਾਰ ਵੀ ਮੌਜੂਦ ਸਨ।