ਅਣ ਸਿੱਖਿਅਤ ਕਾਮਿਆਂ ਲਈ ਘੱਟੋ ਘੱਟ ਉਜਰਤ 10899 ਰੁਪਏ, ਅਰਧ-ਸਿੱਖਿਅਤ ਕਾਮਿਆਂ ਲਈ 11679 ਰੁਪਏ, ਸਿੱਖਿਅਤ ਕਾਮਿਆਂ ਲਈ 12576 ਰੁਪਏ ਅਤੇ ਉੱਚ-ਸਿੱਖਿਅਤ ਕਾਮਿਆਂ ਲਈ 13608 ਰੁਪਏ ਮਹੀਨਾ ਨਿਰਧਾਰਿਤ

ਐਸ ਏ ਐਸ ਨਗਰ, 5 ਅਕਤੂਬਰ (ਸ.ਬ.) ਡਿਪਟੀ ਕਮਿਸ਼ਨਰ ਆਸ਼ਿਕਾ ਜੈਨ ਨੇ ਕਿਰਤ ਕਮਿਸ਼ਨਰ, ਪੰਜਾਬ ਵੱਲੋਂ ਜਾਰੀ ਨੋਟੀਫਿਕੇਸ਼ਨ ਰਾਹੀਂ ਜਿਲ੍ਹੇ ਵਿੱਚ ਚਾਲੂ ਮਾਲੀ ਸਾਲ ਦੌਰਾਨ ਘੱਟੋ-ਘੱਟ ਉਜਰਤਾਂ ਦੀ ਵਿਵਸਥਾ ਨੂੰ ਬਣਾਉਣ ਲਈ ਕਿਹਾ ਹੈ। ਇਸ ਨੋਟੀਫਿਕੇਸ਼ਨ ਮੁਤਾਬਕ ਅਣ-ਸਿੱਖਿਅਤ ਕਾਮਿਆਂ, ਜਿਨ੍ਹਾਂ ਕਰਮਚਾਰੀਆਂ ਨੂੰ ਕੋਈ ਕੰਮ ਦੀ ਜਾਣਕਾਰੀ ਨਾ ਹੋਵੇ ਲਈ ਪ੍ਰਤੀ ਮਹੀਨਾ 10899.82 ਰੁਪਏ (ਪ੍ਰਤੀ ਦਿਨ 419.22 ਰੁਪਏ) ਅਤੇ ਪ੍ਰਤੀ ਘੰਟਾ 52.40 ਰੁਪਏ ਦੀ ਘੱਟੋ-ਘੱਟ ਉਜਰਤ ਨਿਸ਼ਚਿਤ ਕੀਤੀ ਗਈ ਹੈ।

ਅਰਧ-ਸਿੱਖਿਅਤ ਕਾਮੇ, ਜਿਹੜੇ ਆਪਣੇ ਕੰਮ ਦੀ ਥੋੜੀ ਬਹੁਤੀ ਜਾਣਕਾਰੀ ਰੱਖਦੇ ਹੋਣ ਜਾਂ ਉਹਨਾਂ ਕੋਲ ਡਿਪਲੋਮਾ ਹੋਲਡਰ, ਆਈ. ਟੀ. ਆਈ ਦਾ ਸਰਟੀਫਿਕੇਟ ਹੋਵੇ ਜਾਂ 10 ਸਾਲ ਦੇ ਕੰਮ ਦਾ ਤਜਰਬਾ ਹੋਵੇ ਲਈ ਪ੍ਰਤੀ ਮਹੀਨਾ 11679.82 ਰੁਪਏ (ਪ੍ਰਤੀ ਦਿਨ 449.22 ਰੁਪਏ) ਅਤੇ ਪ੍ਰਤੀ ਘੰਟਾ 56.15 ਰੁਪਏ ਦੀ ਘੱਟੋ-ਘੱਟ ਉਜਰਤ ਨਿਸ਼ਚਿਤ ਕੀਤੀ ਗਈ ਹੈ।

ਸਿੱਖਿਅਤ ਕਰਮੀ ਜਿਨ੍ਹਾਂ ਨੂੰ ਆਪਣੇ ਕੰਮ ਦੀ ਪੂਰੀ ਜਾਣਕਾਰੀ ਹੋਵੇ, ਇਸ ਤੋਂ ਇਲਾਵਾ ਕਿਸੇ ਤਕਨੀਕੀ ਅਦਾਰੇ ਤੋਂ ਟਰੇਨਿੰਗ ਲਈ ਹੋਵੇ ਜਾਂ ਪੋਲਟੈਕਨੀਕਲ ਕਾਲਜ ਤੋਂ 3 ਸਾਲ ਦਾ ਡਿਪਲੋਮਾ ਕੀਤਾ ਹੋਵੇ ਲਈ ਪ੍ਰਤੀ ਮਹੀਨਾ 12576.82 ਰੁਪਏ, (ਪ੍ਰਤੀ ਦਿਨ 483.72 ਰੁਪਏ) ਅਤੇ ਪ੍ਰਤੀ ਘੰਟਾ 60.46 ਰੁਪਏ ਦੀ ਘੱਟੋ-ਘੱਟ ਉਜਰਤ ਨਿਸ਼ਚਿਤ ਕੀਤੀ ਗਈ ਹੈ।

ਉੱਚ ਸਿੱਖਿਅਤ ਕਰਮੀ, ਜਿਹੜੇ ਆਪਣੇ ਕੰਮ ਵਿੱਚ ਪੂਰੀ ਤਰ੍ਹਾਂ ਜਾਣੂ ਹੋਣ, ਉਨ੍ਹਾਂ ਕੋਲ ਟੈਕਨੀਕਲ ਜਾਂ ਪ੍ਰੋਫੈਸ਼ਨਲ ਟ੍ਰੇਨਿੰਗ ਹੋਵੇ ਜਾਂ ਕਿਸੇ ਸਰਕਾਰੀ/ਮਾਨਤਾ ਪ੍ਰਾਪਤ ਬੋਰਡ ਜਾਂ ਯੂਨੀਵਰਸਿਟੀ ਤੋਂ ਇੰਜਨੀਅਰਿੰਗ ਜਾਂ ਪ੍ਰੋਫੈਸ਼ਨਲ ਗਰੈਜੂਏਟ ਹੋਵੇ ਅਤੇ ਪੂਰੀ ਜਿੰਮੇਵਾਰੀ ਨਾਲ ਫੈਸਲਾ ਲੈ ਸਕੇ ਲਈ ਪ੍ਰਤੀ ਮਹੀਨਾ 13608.82 ਰੁਪਏ (ਪ੍ਰਤੀ ਦਿਨ 523.41 ਰੁਪਏ) ਅਤੇ ਪ੍ਰਤੀ ਘੰਟਾ 65.42 ਰੁਪਏ ਦੀ ਘੱਟੋ-ਘੱਟ ਉਜਰਤ ਨਿਸ਼ਚਿਤ ਕੀਤੀ ਗਈ ਹੈ।

ਇਸ ਤੋਂ ਇਲਾਵਾ ਦਫ਼ਤਰੀ ਸਟਾਫ਼ ਕੈਟਾਗਿਰੀ ਏ, ਬੀ, ਸੀ ਅਤੇ ਡੀ ਲਈ ਵੀ ਘੱਟੋ-ਘੱਟ ਉਜਰਤ ਨਿਸ਼ਚਿਤ ਕੀਤੀ ਗਈ ਹੈ। ਕੈਟਾਗਿਰੀ ਏ ਜਿਸ ਵਿੱਚ ਪੋਸਟ ਗ੍ਰੈਜੂਏਸ਼ਨ ਡਿਗਰੀ/ਐਮਬੀਏ/ਮਾਰਕੀਟਿੰਗ/ਵਿੱਤ/ਮਨੁੱਖੀ ਸੰਸਾਧਨ ਵਿਕਾਸ ਅਤੇ ਜਾਂ ਕੰਪਨੀ ਸਕੱਤਰ ਦੇ ਬਰਾਬਰ ਜਾਂ ਕੋਈ ਪੇਸ਼ੇਵਰ ਡਿਗਰੀ ਵਾਲਾ ਵਿਅਕਤੀ ਲਈ ਪ੍ਰਤੀ ਮਹੀਨਾ 16069.82 ਰੁਪਏ (ਪ੍ਰਤੀ ਦਿਨ 618.07 ਰੁਪਏ) ਅਤੇ ਪ੍ਰਤੀ ਘੰਟਾ 77.25 ਰੁਪਏ ਘੱਟੋ-ਘੱਟ ਉਜਰਤ ਨਿਸ਼ਚਿਤ ਕੀਤੀ ਗਈ ਹੈ। ਕੈਟਾਗਿਰੀ ਬੀ ਜਿਸ ਵਿੱਚ ਕਿਸੇ ਵੀ ਵਿਸ਼ੇ ਵਿੱਚ ਗ੍ਰੈਜੂਏਟ ਸਮੇਤ ਸਟੈਨੋਗ੍ਰਾਫੀ ਵਿੱਚ ਡਿਪਲੋਮਾ/ਸਰਟੀਫਿਕੇਟ ਕੋਰਸ ਜਾਂ ਕੰਪਿਊਟਰ ਐਪਲੀਕੇਸ਼ਨ ਅਕਾਉਂਟੈਂਸੀ ਵਿੱਚ ਡਿਪਲੋਮਾ ਜਾਂ ਸੁਪਰਵਾਈਜ਼ਰੀ ਸਟਾਫ ਜਿਸ ਨੇ ਸੁਤੰਤਰ ਫੈਸਲਾ ਲੈਣਾ ਹੁੰਦਾ ਹੈ ਲਈ ਪ੍ਰਤੀ ਮਹੀਨਾ 14399.82 ਰੁਪਏ (ਪ੍ਰਤੀ ਦਿਨ 553.83 ਰੁਪਏ) ਅਤੇ ਪ੍ਰਤੀ ਘੰਟਾ 69.22 ਰੁਪਏ ਘੱਟੋ-ਘੱਟ ਉਜਰਤ ਨਿਸ਼ਚਿਤ ਕੀਤੀ ਗਈ ਹੈ। ਕੈਟਾਗਿਰੀ ਸੀ ਜਿਸ ਵਿੱਚ ਇੱਕ ਵਿਅਕਤੀ ਜੋ ਮੈਟ੍ਰਿਕ ਤੋਂ ਉਪਰ ਹੈ (ਪਰ ਗ੍ਰੈਜੂਏਟ ਜਾਂ ਅੰਡਰਗਰੈਜੂਏਟ ਨਹੀਂ ਹੈ) ਲਈ ਪ੍ਰਤੀ ਮਹੀਨਾ 12899.82 ਰੁਪਏ (ਪ੍ਰਤੀ ਦਿਨ 496.14 ਰੁਪਏ) ਪ੍ਰਤੀ ਘੰਟਾ 62.01 ਰੁਪਏ ਘੱਟੋ-ਘੱਟ ਉਜਰਤ ਨਿਸ਼ਚਿਤ ਕੀਤੀ ਗਈ ਹੈ। ਕੈਟਾਗਿਰੀ ਡੀ ਜਿਸ ਵਿੱਚ ਕੋਈ ਵੀ ਦਰਜਾ ਚਾਰ ਕਰਮਚਾਰੀ (ਕੱਚਾ, ਠੇਕੇਦਾਰ ਦੁਆਰਾ ਜਾਂ ਠੇਕੇ ਦੇ ਅਧਾਰ ਤੇ ਜੋ ਮੈਟ੍ਰਿਕ ਪਾਸ ਹੈ, ਲਈ ਪ੍ਰਤੀ ਮਹੀਨਾ 11699.82 ਰੁਪਏ (ਪ੍ਰਤੀ ਦਿਨ 449.99 ਰੁਪਏ) ਅਤੇ ਪ੍ਰਤੀ ਘੰਟਾ 56.24 ਰੁਪਏ ਘੱਟੋ-ਘੱਟ ਉਜਰਤ ਨਿਸ਼ਚਿਤ ਕੀਤੀ ਗਈ ਹੈ।

ਇਸ ਤੋਂ ਇਲਾਵਾ ਖੇਤੀਬਾੜੀ ਰੋਜ਼ਗਾਰ ਵਿੱਚ ਅਟੈਚਡ ਲੇਬਰ ਦੀਆਂ ਘੱਟੋ ਘੱਟ ਉਜਰਤਾਂ (ਅਣ-ਸਿਖਿੱਅਤ ਕਾਮੇ) 74147.72 ਰੁਪਏ (ਸਾਲਾਨਾ ਖਾਣੇ ਸਮੇਤ ਜਾਂ ਬਰਾਬਰ ਦੇ ਅਨਾਜ ਦੇ ਸਮੇਤ) ਸਾਲਾਨਾ ਨਿਯਤ ਕੀਤੀ ਗਈ ਹੈ। ਹੋਰ ਖੇਤੀਬਾੜੀ ਮਜ਼ਦੂਰੀ ਖਾਣੇ ਸਮੇਤ 393.30 ਰੁਪਏ ਅਤੇ ਬਗੈਰ ਖਾਣੇ ਦੇ 437.26 ਰੁਪਏ ਰੋਜ਼ਾਨਾ ਆਧਾਰ ਤੇ ਨਿਸ਼ਚਿਤ ਕੀਤੀ ਗਈ ਹੈ। ਭੱਠਿਆਂ ਨਾਲ ਸਬੰਧਤ ਕਾਮਿਆਂ ਲਈ ਪ੍ਰਤੀ 1000 ਇੱਟਾ ਜਾਂ ਟਾਈਲਾਂ ਦੀ ਉਜਰਤ ਪਥੇਰਾ ਜਮਾਂਦਾਰੀ ਕਮਿਸ਼ਨ ਸਮੇਤ ਇੱਟਾਂ 898.50 ਰੁਪਏ, ਟਾਈਲਾਂ 999.86 ਰੁਪਏ, ਪਥੇਰਾ ਜਮਾਂਦਾਰੀ ਕਮਿਸ਼ਨ ਬਿਨ੍ਹਾਂ ਇੱਟਾਂ 845.99 ਰੁਪਏ, ਟਾਈਲਾਂ 952.06 ਰੁਪਏ, ਭਰਾਈ ਵਾਲਾ ਪਸ਼ੂ ਸ਼ਕਤੀ ਨਾਲ (ਖੋਤਾ, ਖੱਚਰ, ਰੇੜੀ, ਠੇਲਾ) 333.84 ਰੁਪਏ, ਮਕੈਨੀਕਲ ਪਾਵਰ ਨਾਲ (ਟੈਂਪੂ, ਮੋਟਰ ਗੱਡੀ) 290.40 ਰੁਪਏ, ਟਰੱਕ ਜਾਂ ਟਰਾਲੀ ਵਿੱਚ ਲਦਾਈ ਅਤੇ ਉਤਰਾਈ (ਪੱਕੀ ਇੱਟ) 247.83 ਰੁਪਏ, ਚਿਨਾਈ ਵਾਲਾ 67.09 ਰੁਪਏ, ਕੇਰੀ ਵਾਲਾ 56.45 ਰੁਪਏ, ਨਿਕਾਸੀ ਵਾਲਾ 214.04 ਰੁਪਏ, ਮਿਸਤਰੀ 166.41 ਰੁਪਏ ਘੱਟੋ-ਘੱਟ ਨਿਯਤ ਕੀਤੀ ਗਈ ਹੈ।

ਇਸ ਦੇ ਨਾਲ ਹੀ ਦਰਜਾ ਚਾਰ ਦੇ ਕੰਨਟਨਜੈਂਸੀ ਪੇਡ ਦੇ ਪਾਰਟ ਟਾਈਮ ਕਰਮਚਾਰੀ ਜੋ ਇੱਕ ਤੋਂ ਵੱਧ ਸਰਕਾਰੀ ਦਫਤਰਾਂ ਵਿੱਚ ਕੰਮ ਕਰਦੇ ਹਨ, ਉਨ੍ਹਾਂ ਦੀ ਤਨਖਾਹ ਨਿਰਧਾਰਤ ਕੀਤੀ ਗਈ ਤਨਖਾਹ ਤੋਂ ਵਧਣੀ ਨਹੀਂ ਚਾਹੀਦੀ। ਕਰਮਚਾਰੀਆਂ ਨੂੰ ਹਫਤੇ ਵਿੱਚ ਇੱਕ ਛੁੱਟੀ ਦਿੱਤੀ ਜਾਵੇਗੀ। ਜੇਕਰ ਕਰਮਚਾਰੀ ਨੂੰ ਕਿਸੇ ਜ਼ਰੂਰੀ ਕੰਮ ਕਾਰਨ ਛੁੱਟੀ ਨਹੀਂ ਦਿੱਤੀ ਗਈ ਤਾਂ ਉਸਨੂੰ ਇੱਕ ਦਿਨ ਦੀ ਉਜ਼ਰਤ ਦਿੱਤੀ ਜਾਣੀ ਹੈ। ਲੇਬਰ ਐਕਟ ਮੁਤਾਬਿਕ ਜੋ ਸਹੂਲਤਾਂ ਬਣਦੀਆਂ ਹਨ, ਉਹ ਵੀ ਕਰਮਚਾਰੀਆਂ ਨੂੰ ਦਿੱਤੀਆਂ ਜਾਣੀਆਂ ਬਣਦੀਆਂ ਹਨ।