ਭ੍ਰਿਸ਼ਟਾਚਾਰੀਆਂ ਨੂੰ ਮਿਲ ਰਹੀ ਹੈ ਸਿਆਸੀ ਸ਼ਹਿ

ਚੰਡੀਗੜ੍ਹ, 19 ਜੁਲਾਈ (ਸ.ਬ.) ਭਾਰਤੀ ਕਿਸਾਨ ਯੂਨੀਅਨ ਰਾਜੇਵਾਲ ਦੇ ਪ੍ਰਧਾਨ ਸz. ਬਲਬੀਰ ਸਿੰਘ ਰਾਜੇਵਾਲ ਨੇ ਇਲਜਾਮ ਲਗਾਇਆ ਹੈ ਕਿ ਪੰਜਾਬ ਵਿੱਚ ਮਿਲਕਫੈਡ ਦੇ ਮਿਲਕ ਪਲਾਟਾਂ ਵਿੱਚ ਵੱਡੇ ਪੱਧਰ ਤੇ ਹੁੰਦੇ ਭ੍ਰਿਸ਼ਟਾਚਾਰ ਨੂੰ ਕਾਬੂ ਕਰਨ ਦੀ ਥਾਂ ਇਸਨੂੰ ਸਿਆਸੀ ਸ਼ਹਿ ਮਿਲ ਰਹੀ ਹੈ। ਇਸਦਾ ਨਤੀਜਾ ਇਹ ਹੋਇਆ ਹੈ ਕਿ ਮੁਨਾਫੇ ਵਿੱਚ ਚਲਦੇ ਪਲਾਂਟ ਘਾਟੇ ਵਿੱਚ ਆ ਗਏ ਹਨ। ਉਹਨਾਂ ਕਿਹਾ ਕਿ ਮਿਲਕਫੈਡ ਸਹਿਕਾਰੀ ਮਿਲਕ ਪਲਾਟਾਂ ਨੂੰ ਡੋਬ ਕੇ ਅਮੁੱਲ ਨੂੰ ਅੱਗੇ ਤੋਰਨ ਦੇ ਰਾਹ ਤੇ ਚਲ ਰਿਹਾ ਹੈ ਜਿਸਦਾ ਪੰਜਾਬ ਦੀ ਆਰਥਿਕਤਾ ਨੂੰ ਵੱਡਾ ਨੁਕਸਾਨ ਹੋਣਾ ਹੈ।

ਮਿਲਕ ਪਲਾਂਟਾਂ ਦੇ ਭ੍ਰਿਸ਼ਟਾਚਾਰ ਬਾਰੇ ਗੱਲ ਕਰਦਿਆਂ ਉਹਨਾਂ ਕਿਹਾ ਕਿ ਵਿਭਾਗ ਵਿੱਚ ਲੁਧਿਆਣੇ ਦੇ ਜਨਰਲ ਮੈਨੇਜਰ ਸ. ਸੁਰਜੀਤ ਸਿੰਘ ਵੱਲ ਵਿਭਾਗੀ ਜਾਂਚ ਤੋਂ ਬਾਅਦ 1.11 ਕਰੋੜ ਦੀ ਵਸੂਲੀ ਦੇ ਹੁਕਮ ਹੋਏ। ਜਾਇੰਟ ਰਜਿਸਟਰਾਰ ਨੇ ਵੀ 2020 ਵਿੱਚ ਇਸ ਵਸੂਲੀ ਦੇ ਹੁਕਮ ਦਿੱਤੇ ਅਤੇ 2023 ਵਿੱਚ ਪਲਾਂਟ ਦੇ ਬੋਰਡ ਆਫ਼ ਡਾਇਰੈਕਟਰ ਨੇ ਵੀ ਇਹ ਵਸੂਲੀ ਕਰਨ ਦਾ ਮਤਾ ਪਾਸ ਕੀਤਾ ਪਰ ਕੋਈ ਕਾਰਵਾਈ ਨਹੀਂ। ਇਸੇ ਤਰ੍ਹਾਂ 4 ਤੋਂ 5 ਕਰੋੜ ਦਾ ਹੁਸ਼ਿਆਰਪੁਰ ਦਾ ਘਪਲਾ ਵੀ ਹਵਾ ਵਿੱਚ ਹੀ ਹੈ। ਇਸੇ ਅਧਿਕਾਰੀ ਨੇ ਪਟਿਆਲੇ ਦੇ ਮੁਨਾਫੇ ਵਿੱਚ ਚਲ ਰਹੇ ਪਲਾਂਟ ਨੂੰ ਆਪਣੀ ਸੱਤ ਮਹੀਨੇ ਦੀ ਸਰਦਾਰੀ ਵਿੱਚ 11 ਕਰੋੜ ਦੇ ਘਾਟੇ ਵਿੱਚ ਫਸਾ ਦਿੱਤਾ। ਇਸਦੇ ਖਿਲਾਫ ਕਾਰਵਾਈ ਕਰਨ ਦੀ ਥਾਂ ਉਲਟਾ ਇਸ ਨੂੰ ਹੋਰ ਵੱਡਾ ਪਲਾਂਟ ਲੁਧਿਆਣੇ ਜੀ. ਐਮ. ਲਗਾ ਕੇ ਨਿਵਾਜਿਆ ਗਿਆ। ਉਹਨਾਂ ਕਿਹਾ ਕਿ ਸਰਕਾਰ ਨੇ ਹਰ ਘਪਲੇਬਾਜ਼ ਨੂੰ ਉਸ ਦੀ ਮਰਜ਼ੀ ਦੀ ਜਗ੍ਹਾ ਲਾ ਕੇ ਨਿਵਾਜਿਆ।

ਉਹਨਾਂ ਕਿਹਾ ਕਿ ਮੁਹਾਲੀ ਵਿੱਚ 83000 ਦੁੱਧ ਦੀ ਟਰੇਅ ਦੁੱਧ ਨਾਲ ਭਰ ਕੇ ਡਿਸਟਰੀਬਿਊਟਰਾਂ ਕੋਲ ਗਈ ਵਾਪਸ ਨਹੀਂ ਆਈ। ਇਸ ਸਮੇਂ ਦੇ ਜੀ. ਐਮ. ਨੂੰ ਘਪਲੇ ਤੋਂ ਬਾਅਦ ਉਸ ਦੀ ਪਸੰਦ ਦੇ ਸਟੇਸ਼ਨ ਜਲੰਧਰ ਤਾਇਨਾਤ ਕਰ ਦਿੱਤਾ ਗਿਆ। ਇਸੇ ਤਰ੍ਹਾਂ 9.96 ਲੱਖ ਦੁੱਧ ਦੀਆਂ ਟਰੇਆਂ ਦੇ 5 ਕਰੋੜ ਦੀ ਕੋਈ ਪੁੱਛ ਗਿੱਛ ਨਹੀਂ ਹੋਈ ਅਤੇ ਪਲਾਂਟ ਕੇਵਲ ਟਰੇਆਂ ਦੀ 1.68 ਕਰੋੜ ਕੀਮਤ ਦਾ ਘਾਲਾ ਮਾਲਾ ਦਿਖਾ ਰਿਹਾ ਹੈ, ਜਦ ਕਿ ਇਹ 6.68 ਕਰੋੜ ਦਾ ਘਪਲਾ ਹੈ। ਉਹਨਾਂ ਕਿਹਾ ਕਿ ਮਿਲਕ ਪਲਾਂਟਾਂ ਵਿੱਚ ਦੁੱਧ ਢੋਣ ਵਾਲੇ ਟਰਾਂਸਪਰੋਟਰਾਂ ਨਾਲ ਮਿਲ ਕੇ ਉਨ੍ਹਾਂ ਦੇ ਰੂਟ ਲੰਬੇ ਦਿਖਾ ਕੇ ਹਰ ਪਲਾਂਟ ਵਿੱਚ ਇਕ ਕਰੋੜ ਸਲਾਨਾ ਦਾ ਗੋਲਮਾਲ ਹੁੰਦਾ ਹੈ। ਲੁਧਿਆਣੇ ਮਿਲਕ ਪਲਾਂਟ ਵਿੱਚ ਟਰਾਂਸਪਰੋਟਾਂ ਵੱਲੋਂ ਦੁੱਧ ਵਿੱਚ ਮਿਲਾਵਟ ਕਰਨ ਦੇ ਕੇਸਾਂ ਵਿੱਚ ਵਾਧਾ ਹੋ ਰਿਹਾ ਹੈ ਪਰ ਕੋਈ ਕਾਰਵਾਈ ਨਹੀਂ ਹੋਈ।

ਉਹਨਾਂ ਕਿਹਾ ਕਿ ਲੁਧਿਆਣੇ ਮਿਲਕ ਪਲਾਂਟ ਦੇ ਅਧਿਕਾਰੀਆਂ ਵਲੋਂ ਪਿੰਡਾਂ ਦੇ ਦੁੱਧ ਇਕੱਠਾ ਕਰਨ ਵਾਲੀਆਂ ਸਭਾਵਾਂ ਨੂੰ ਇਕ ਗਿੱਦੜ ਚਿੱਠੀ ਰਾਹੀਂ ਹੁਕਮ ਚਾੜਿਆ ਹੋਇਆ ਹੈ ਕਿ ਦੁੱਧ ਵਿੱਚ ਬੈਟ ਜਾਂ ਐਸ. ਐਨ. ਐਫ਼. ਮਾਪਣ ਲਈ ਸਪਲਾਈ ਕੀਤੇ ਬਟੈਰੋਮੀਟਰ ਦੀ ਰੀਡਿੰਗ ਨਾਲ ਪੁਆਇੰਟ ਇਕ ਜਾਂ ਡੇਢ ਘੱਟ ਰੀਡਿੰਗ ਲੇਖੇ ਵਿੱਚ ਲਈ ਜਾਵੇ ਜਦੋਂਕਿ ਕਿਸੇ ਨੂੰ ਇੰਝ ਕਰਨ ਦਾ ਅਧਿਕਾਰ ਨਹੀਂ। ਮਿਲਕ ਪਲਾਂਟ ਨੇ ਦੁੱਧ ਉਤਪਾਦਕਾਂ ਦੀ ਦੁੱਧ ਦੀ ਅਦਾਇਗੀ ਰੋਕ ਕੇ ਆਪਣੇ ਚਹੇਤੇ ਕੋਲਡ ਸਟੋਰ ਦੇ ਠੇਕੇਦਾਰ ਨੂੰ ਰੂਲਜ਼ ਦੀ ਉਲੰਘਣਾ ਕਰਕੇ ਅਦਾਇਗੀ ਕਰ ਦਿੱਤੀ। ਅਜਿਹੇ ਅਨੇਕਾਂ ਕਰੋੜਾਂ ਦੇ ਘਪਲੇ ਹਨ, ਕੋਈ ਪੁੱਛਣ ਵਾਲਾ ਨਹੀਂ।

ਉਹਨਾਂ ਕਿਹਾ ਕਿ ਪਹਿਲੀ ਵਾਰ ਹੋਇਆ ਕਿ ਵਿਜੀਲੈਂਸ ਵਾਲਿਆਂ ਨੇ ਮੁਹਾਲੀ ਦੇ ਮੈਨੇਜਰ ਦੁੱਧ ਪ੍ਰਾਪਤੀ ਸ੍ਰੀ ਵਾਸਤਵਾ ਨੂੰ 50000 ਰੁਪਏ ਦੀ ਰਕਮ ਸਮੇਤ ਗ੍ਰਿਫ਼ਤਾਰ ਕੀਤਾ। ਸੀ. ਬੀ. ਆਈ. ਨੇ ਮੁਹਾਲੀ ਦੇ ਮੈਨੇਜਰ ਪ੍ਰੋਡਕਸ਼ਨ ਨੂੰ 76 ਲੱਖ ਦੇ ਇਕ ਘਪਲੇ ਵਿੱਚ ਗ੍ਰਿਫ਼ਤਾਰ ਕੀਤਾ। ਅਨੇਕਾਂ ਘਪਲੇ ਹਨ ਪਰ ਮਿਲਕਫ਼ੈਡ ਕਿਸੇ ਵੀ ਕੇਸ ਵਿੱਚ ਸਿਆਸੀ ਦਖ਼ਲ ਅੰਦਾਜ਼ੀ ਕਾਰਨ ਸਮੇਂ ਸਿਰ ਨਾ ਤਾਂ ਕਾਰਵਾਈ ਕਰਦਾ ਹੈ ਅਤੇ ਨਾ ਹੀ ਕਿਸੇ ਨੂੰ ਸਜ਼ਾ ਦਿੰਦਾ ਹੈ। ਉਹਨਾ ਕਿਹਾ ਕਿ ਮਿਲਕਫ਼ੈਡ ਕੋਲ ਅੱਜ ਵੀ 70 ਤੋਂ 80 ਪ੍ਰਤੀਸ਼ਤ ਇਮਾਨਦਾਰ ਅਤੇ ਮਿਹਨਤ ਨਾਲ ਕੰਮ ਕਰਨ ਵਾਲੇ ਕਰਮਚਾਰੀ, ਅਧਿਕਾਰੀ ਹਨ, ਪਰ ਉਹ ਬੇਹੌਸਲਾ ਹੋ ਕੇ ਢੇਰੀ ਢਾਹੀ ਬੈਠੇ ਹਨ। ਸਿਰਫ਼ 20 ਪ੍ਰਤੀਸ਼ਤ ਸਿਆਸੀ ਪੁਸ਼ਤ ਪਨਾਹੀ ਵਾਲੇ ਸਾਰੇ ਮਿਲਕ ਪਲਾਂਟਾਂ ਨੂੰ ਦੋਹੀਂ ਹੱਥੀਂ ਲੁੱਟ ਰਹੇ ਹਨ ਅਤੇ ਪੁੱਛਣ ਵਾਲਾ ਕੋਈ ਨਹੀਂ ਹੈ।

ਉਹਨਾਂ ਕਿਹਾ ਕਿ ਪੰਜਾਬ ਵਿੱਚ ਮਿਲਕਫ਼ੈਡ 2021-22 ਵਿੱਚ 9.63 ਕਰੋੜ ਦੇ ਮੁਨਾਫੇ ਵਿੱਚ ਸੀ ਜੋ 2022-23 ਵਿੱਚ ਅਚਾਨਕ 11 ਕਰੋੜ 82 ਲੱਖ ਦੇ ਘਾਟੇ ਵਿੱਚ ਚਲੀ ਗਈ। ਇਸ ਵੇਲੇ ਸਹਿਕਾਰੀ ਮਿਲਕ ਯੂਨੀਅਨਾਂ ਦੇ 11 ਵਿੱਚੋਂ 6 ਅਤੇ ਮਿਲਕਫ਼ੈਡ ਦੇ 4 ਵਿੱਚੋਂ 2 ਮਿਲਕ ਪਲਾਂਟ ਵੱਡੇ ਘਾਟੇ ਵਿੱਚ ਹਨ। ਸਾਰੇ ਮਿਲਕ ਪਲਾਂਟਾਂ ਦੀ ਰੋਜ਼ਾਨਾ ਦੁੱਧ ਸਪਲਾਈ ਦੇ ਪੈਸੇ ਐਡਵਾਂਸ ਮਿਲਕਫ਼ੈਡ ਕੋਲ ਜਾਂਦੇ ਹਨ। ਉਹਨਾਂ ਕਿਹਾ ਕਿ ਦੁੱਧ ਉਤਪਾਦਨ ਵੀ ਪੰਜਾਬ ਦੇ ਕਿਸਾਨਾਂ ਲਈ ਜੀਵਨ ਰੇਖਾ ਹੈ। ਪੰਜਾਬ ਵਿੱਚ ਸਹਿਕਾਰੀ ਖੇਤਰ ਵਿੱਚ ਅਤੇ ਮਿਲਕਫ਼ੈਡ ਅਧੀਨ ਕੁੱਲ 17 ਦੁੱਧ ਦੇ ਪਲਾਂਟ ਹਨ। ਇਹ ਪਲਾਂਟ ਪੰਜਾਬ ਵਿੱਚ ਪੈਦਾ ਹੁੰਦੇ ਕੁੱਲ 3.5 ਕਰੋੜ ਲਿਟਰ ਰੋਜ਼ਾਨਾ ਦੁੱਧ ਦਾ 15 ਪ੍ਰਤੀਸ਼ਤ ਅਰਥਾਤ 30 ਲੱਖ ਲਿਟਰ ਦੁੱਧ ਖਰੀਦ ਕੇ ਪ੍ਰਾਸੈਸ ਕਰਦੇ ਹਨ। ਬਾਕੀ ਦੁੱਧ ਦੀ ਪੈਦਾਵਾਰ ਘਰੇਲੂ ਖਪਤ ਅਤੇ ਪ੍ਰਾਈਵੇਟ ਪਲਾਟਾਂ, ਦੋਧੀਆਂ ਆਦਿ ਕੋਲ ਚਲੀ ਜਾਂਦੀ ਹੈ।

ਉਹਨਾਂ ਕਿਹਾ ਕਿ ਕੁਝ ਸਮਾਂ ਪਹਿਲਾਂ ਤੱਕ ਸਹਿਕਾਰੀ ਯੂਨੀਅਨਾਂ ਦੇ ਪ੍ਰਬੰਧਕੀ ਬੋਰਡ ਦੁੱਧ ਦਾ ਰੇਟ ਮਿਥਿਆ ਕਰਦੇ ਸਨ, ਪਰ ਹੁਣ ਇਹ ਕੰਮ ਮਿਲਕਫ਼ੈਡ ਦੀ ਅਫ਼ਸਰਸ਼ਾਹੀ ਦੇ ਹੱਥ ਚਲਾ ਗਿਆ ਹੈ। ਇਸ ਵੇਲੇ ਵੇਰਕਾ ਅਧੀਨ ਮਿਲਕ ਪਲਾਂਟਾਂ ਵਿੱਚ ਮਿਲਕਫ਼ੈਡ ਨੇ ਮੱਝ ਦੇ ਦੁੱਧ ਦਾ ਰੇਟ 82 ਰੁਪਏ 10.0 ਫ਼ੈਟ ਅਤੇ ਗਾਂ ਦਾ 38 ਰੁਪਏ 35 ਪੈਸੇ 4.5 ਫ਼ੈਟ ਦਾ ਰੇਟ ਤਹਿ ਕੀਤਾ ਹੋਇਆ ਹੈ। ਉਹਨਾਂ ਕਿਹਾ ਕਿ ਲੰਬੇ ਸਮੇਂ ਤੋਂ ਪੰਜਾਬ ਦੇ ਵੇਰਕਾ ਦਾ ਦੁੱਧ ਦਾ ਰੇਟ ਹਮੇਸ਼ਾ ਗੁਜਰਾਤ ਦੇ ਅਮੁੱਲ ਨਾਲੋਂ ਜਿਆਦਾ ਰਿਹਾ ਹੈ। ਪਰੰਤੂ ਹੁਣ ਜਦੋਂ ਪੰਜਾਬ ਵਿੱਚ ਅਮੁੱਲ ਨੇ ਦੁੱਧ ਦੇ ਖੇਤਰ ਵਿੱਚ ਪੈਰ ਪਸਾਰਨੇ ਸ਼ੁਰੂ ਕੀਤੇ ਹਨ ਤਾਂ ਉਹ ਵੇਰਕਾ ਨਾਲੋਂ 20 ਰੁਪਏ ਪ੍ਰਤੀ ਫ਼ੈਟ ਦਾ ਵੱਧ ਰੇਟ ਦੇ ਰਿਹਾ ਹੈ। ਉਹਨਾਂ ਕਿਹਾ ਕਿ ਸਰਕਾਰ ਨੂੰ ਚਿਤਾਵਨੀ ਦਿੱਤੀ ਕਿ ਜੇ ਵੇਰਕਾ ਅਤੇ ਮਿਲਕਫ਼ੈਡ ਫੇਲ੍ਹ ਕਰਕੇ ਅਮੁੱਲ ਨੂੰ ਕਬਜਾ ਕਰਨ ਲਈ ਉਤਸ਼ਾਹਿਤ ਕੀਤਾ ਤਾਂ ਇਸ ਦੇ ਗੁਜਰਾਤ ਦੀ ਸਹਿਕਾਰੀ ਸਭਾ ਹੋਣ ਕਾਰਨ ਲਾਭ ਦਾ ਸਾਰਾ ਹਿੱਸਾ ਗੁਜਰਾਤ ਦੇ ਕਿਸਾਨਾਂ ਨੂੰ ਜਾਵੇਗਾ, ਪੰਜਾਬ ਦੇ ਕਿਸਾਨਾਂ ਦੇ ਇਸ ਵੱਡੇ ਦੁੱਧ ਉਤਪਾਦਨ ਦੇ ਕਿੱਤੇ ਨੂੰ ਭਾਰੀ ਸੱਟ ਵੱਜੇਗੀ।

ਉਹਨਾਂ ਮੰਗ ਕੀਤੀ ਕਿ ਦੁੱਧ ਪਲਾਂਟਾਂ ਅਤੇ ਮਿਲਕਫ਼ੈਡ ਦੇ ਬਹੁ ਕਰੋੜੀ ਘਪਲੇ ਦੀ ਤੁਰੰਤ ਨਿਆਇਕ ਜਾਂਚ ਕਰਵਾਈ ਜਾਵੇ ਕਿਉਂਕਿ ਵਿਭਾਗੀ ਜਾਂਚ ਆਪਣੀ ਭਰੋਸੇਯੋਗਤਾ ਗੁਆ ਚੁੱਕੀ ਹੈ। ਉਹਨਾਂ ਕਿਹਾ ਕਿ ਜੇਕਰ ਲੋਕਾਂ ਸਾਮ੍ਹਣੇ ਸਚਾਈ ਨਾ ਲਿਆਂਦੀ ਗਈ ਤਾਂ ਉਹ ਸੰਘਰਸ਼ ਕਰਨ ਲਈ ਮਜ਼ਬੂਰ ਹੋਣਗੇ।

ਇਸ ਮੌਕੇ ਉਹਨਾਂ ਦੇ ਨਾਲ ਪਰਮਿੰਦਰ ਸਿੰਘ ਚਾਲਾਕੀ, ਪਰਮਦੀਪ ਸਿੰਘ ਬੈਦਵਾਣ, ਕਿਰਪਾਲ ਸਿੰਘ ਸਿਆਓ, ਬਲਦੇਵ ਸਿੰਘ ਚੱਕਲ, ਲੱਖਵਿੰਦਰ ਸਿੰਘ ਕਰਾਲਾ, ਬਲਦੀਪ ਸਿੰਘ ਸੰਗਤਪੁਰਾ, ਹਰਮਨਪ੍ਰੀਤ ਸਿੰਘ ਸਹੇੜੀ, ਤੇਜਿੰਦਰ ਸਿੰਘ ਪੂਨੀਆ, ਯਾਦਵਿੰਦਰ ਸਿੰਘ ਮੁੰਡੀ ਖਰੜ ਵੀ ਹਾਜਿਰ ਸਨ।