ਬਰਸਾਤੀ ਪਾਣੀ ਦੀ ਨਿਕਾਸੀ, ਟੁੱਟੀਆਂ ਗਲੀਆਂ, ਗੰਦਗੀ, ਬਿਜਲੀ ਦੀਆਂ ਤਾਰਾਂ ਅਤੇ ਅੱਧੇ ਅਧੂਰੇ ਵਿਕਾਸ ਕਾਰਜ ਹੋਣਗੇ ਮੁੱਖ ਮੁੱਦੇ

ਪਵਨ ਰਾਵਤ

ਬਲੌਂਗੀ, 27 ਸਤੰਬਰ

ਪੰਜਾਬ ਵਿੱਚ ਪੰਚਾਇਤੀ ਚੋਣਾਂ ਦੀ ਬਿਗੁਲ ਵੱਜ ਚੁੱਕਾ ਹੈ ਅਤੇ ਨਾਮਜਦਗੀ ਭਰਨ ਤੋਂ ਪਹਿਲਾ ਹੀ ਸਰਪੰਚੀ ਦੇ ਉਮੀਦਵਾਰਾ ਵਲੋਂ ਅੰਦਰ ਖਾਤੇ ਤਾਲ ਮੇਲ ਬਣਾਉਣਾ ਵੀ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਦੀ ਸਰਕਾਰ ਬਣਨ ਤੋਂ ਬਾਅਦ ਪੰਚਾਇਤਾਂ ਨੂੰ ਲੈ ਕੇ ਲੋਕਾਂ ਵਿੱਚ ਕਾਫੀ ਉਤਸ਼ਾਹ ਸੀ ਕਿ ਪੰਚਾਇਤੀ ਚੋਣਾਂ ਛੇਤੀ ਕਰਵਾ ਦਿੱਤੀਆਂ ਜਾਣਗੀਆਂ ਅਤੇ ਪਿੰਡਾਂ ਦੇ ਵਸਨੀਕ ਲੰਬੇ ਸਮੇਂ ਤੋਂ ਪੰਚਾਇਤੀ ਚੋਣਾਂ ਦੇ ਐਲਾਨ ਦੀ ਉਡੀਕ ਕਰ ਰਹੇ ਸਨ।

ਇਸ ਦੌਰਾਨ ਪਿੰਡ ਦੇ ਲੋਕਾਂ ਵਲੋਂ ਰੋਜ ਅਖਬਾਰ ਪੜੇ ਜਾਂਦੇ ਸੀ ਕਿ ਸ਼ਾਇਦ ਪੰਚਾਇਤ ਚੋਣਾਂ ਦਾ ਐਲਾਨ ਹੋ ਗਿਆ ਹੋਵੇ ਪਰੰਤੂ ਸਰਕਾਰ ਵਲੋਂ ਸੱਤਾ ਸੰਭਾਲਣ ਦੇ ਢਾਈ ਸਾਲ ਬਾਅਦ ਤਕ ਪੰਚਾਇਤੀ ਚੋਣਾਂ ਕਰਵਾਉਣ ਸੰਬੰਧੀ ਕੁੱਝ ਨਾ ਕੀਤੇ ਜਾਣ ਕਾਰਨ ਲੋਕਾਂ ਅਤੇ ਉਮੀਦਵਾਰਾਂ ਵਿੱਚ ਚੋਣਾਂ ਦਾ ਉਤਸ਼ਾਹ ਕਾਫੀ ਹੱਦ ਤਕ ਠੰਡਾ ਪੈ ਗਿਆ ਸੀ ਅਤੇ ਲੋਕਾਂ ਨੂੰ ਲੱਗਣ ਲੱਗ ਗਿਆ ਸੀ ਕਿ ਸੂਬੇ ਵਿੱਚ ਸਰਕਾਰ ਬਦਲਣ ਤੋਂ ਬਾਅਦ ਹੀ ਚੋਣਾਂ ਹੋਣਗੀਆਂ, ਪਰੰਤੂ ਬੀਤੇ ਦਿਨੀਂ ਪੰਜਾਬ ਰਾਜ ਚੋਣ ਕਮਿਸ਼ਨ ਵਲੋਂ ਤੁਰਤ ਫੁਰਤ ਵਿੱਚ ਪੰਚਾਇਤ ਚੋਣਾਂ ਦਾ ਐਲਾਨ ਕਰ ਦਿੱਤਾ ਅਤੇ ਹੁਣ ਆਉਣ ਵਾਲੀ 15 ਅਕਤੂਬਰ ਨੂੰ ਵੋਟਾਂ ਪੈਣੀਆਂ ਹਨ।

ਜਿਕਰਯੋਗ ਹੈ ਕੀ ਪਿਛਲੇ ਵਾਰ (2018 ਵਿੱਚ) ਹੋਈਆਂ ਪੰਚਾਇਤ ਚੋਣਾਂ ਦੌਰਾਨ ਪਿੰਡ ਬਲੌਂਗੀ ਵਿੱਚ ਸਰਪੰਚ ਦਾ ਅਹੁਦਾ ਜਨਰਲ ਸੀ ਅਤੇ ਬਲੌਂਗੀ ਕਲੋਨੀ ਵਿੱਚ ਜਨਰਲ (ਮਹਿਲਾ) ਵਾਸਤੇ ਰਾਖਵਾਂ ਸੀ। ਇਸ ਵਾਰ ਵੀ ਇਸ ਵਿੱਚ ਕੋਈ ਫੇਰ ਬਦਲ ਨਹੀਂ ਹੋਇਆ ਹੈ ਅਤੇ ਪਿੰਡ ਬਲੌਂਗੀ ਵਿੱਚ ਜਿੱਥੇ ਸਰਪੰਚ ਦੀ ਸੀਟ ਜਨਰਲ ਰੱਖੀ ਗਈ ਹੈ ਉੱਥੇ ਬਲੌਂਗੀ ਕਲੋਨੀ ਵਿੱਚ ਸਰਪੰਚ ਦੀ ਸੀਟ ਜਨਰਲ (ਮਹਿਲਾ) ਵਾਸਤੇ ਰਾਖਵੀਂ ਐਲਾਨੀ ਗਈ ਹੈ। ਪਿੰਡ ਬਲੌਂਗੀ ਵਿੱਚ ਜਿੱਥੇ 9 ਪੰਚ ਅਤੇ ਇੱਕ ਸਰਪੰਚ ਦੀ ਚੋਣ ਹੋਣੀ ਹੈ ਉੱਥੇ ਬਲੌਂਗੀ ਕਲੋਨੀ ਵਿੱਚ 13 ਪੰਚ ਅਤੇ ਇੱਕ ਮਹਿਲਾ ਸਰਪੰਚ ਚੁਣੀ ਜਾਣੀ ਹੈ।

ਜੇਕਰ ਬਲੌਂਗੀ ਕਾਲੋਨੀ ਦੀ ਗੱਲ ਕਰੀਏ ਤਾਂ ਇਹ ਬਹੁਤ ਵੱਡੀ ਪੰਚਾਇਤ ਹੈ ਜਿੱਥੇ 12000 ਦੇ ਕਰੀਬ ਵੋਟਰ ਹਨ। ਪਿਛਲੀ ਵਾਰ ਹੋਈਆਂ ਚੌਣਾਂ ਦੌਰਾਨ ਬਲੌਂਗੀ ਕਾਲੋਨੀ ਵਿੱਚ ਰਿੰਪਲ ਧੀਮਾਨ ਪਤਨੀ ਵੀਰ ਪ੍ਰਤਾਲ ਬਾਵਾ, ਜਸਵਿੰਦਰ ਕੌਰ ਪਤਨੀ ਮੱਖਣ ਸਿੰਘ, ਗੁਰਵਿੰਦਰ ਕੌਰ ਪਤਨੀ ਕੁਲਦੀਪ ਸਿੰਘ ਬਿੱਟੂ ਅਤੇ ਸਰੋਜਾ ਦੇਵੀ ਪਤਨੀ ਦਿਨੇਸ਼ ਕੁਮਾਰ ਦੇ ਵਿਚਕਾਰ ਮੁਕਾਬਲਾ ਹੋਇਆ ਸੀ। ਬਲੌਂਗੀ ਕਲੋਨੀ ਵਿੱਚ ਜਿਆਦਾਤਰ ਪ੍ਰਵਾਸੀ ਲੋਕ ਰਹਿੰਦੇ ਹਨ ਅਤੇ ਪਿਛਲੀ ਵਾਰ ਸਰਪੰਚ ਦੀ ਚੋਣ ਜਿੱਤਣ ਵਾਲੀ ਸਰੋਜਾ ਦੇਵੀ ਪਤਨੀ ਦਿਨੇਸ਼ ਕੁਮਾਰ ਨੂੰ ਇਸਦਾ ਵੱਡਾ ਫਾਇਦਾ ਮਿਲਿਆ ਸੀ ਜੋ ਖੁਦ ਵੀ ਪ੍ਰਵਾਸੀ ਭਾਈਚਾਰੇ ਤੋਂ ਹਨ।

ਬਲੌਂਗੀ ਕਾਲੋਨੀ ਦੇ ਸਰਪੰਚ ਦੀ ਕੁਰਸੀ ਪਿਛਲੀ ਵਾਰ ਮਹਿਲਾ ਉਮੀਦਵਾਰ ਵਾਸਤੇ ਰਾਖਵੀਂ ਹੋਣ ਕਾਰਨ ਸਰੰਪਚੀ ਦੀ ਚੋਣ ਦੀ ਤਿਆਰੀ ਕਰ ਰਹੇ ਆਗੂਆਂ ਨੂੰ ਭਰੋਸਾ ਸੀ ਕਿ ਇਸ ਵਾਰ ਇਹ ਸੀਟ ਜਨਰਲ ਐਲਾਨੀ ਜਾਵੇਗੀ ਅਤੇ ਪਿਛਲੀ ਵਾਰ ਮਜਬੂਰੀ ਵਿੱਚ ਆਪਣੀਆਂ ਪਤਨੀਆਂ ਨੂੰ ਚੋਣ ਲੜਾਉਣ ਵਾਲੇ ਆਗੂਆਂ ਵਲੋਂ ਕਾਫੀ ਸਮੇਂ ਤੋਂ ਤਿਆਰੀਆਂ ਵੀ ਕੀਤੀਆਂ ਜਾ ਰਹੀਆਂ ਸਨ ਪਰੰਤੂ ਇਸ ਵਾਰ ਫਿਰ ਇਹ ਸੀਟ ਮਹਿਲਾ ਉਮੀਦਵਾਰ ਵਾਸਤੇ ਰਾਖਵੀਂ ਕਰ ਦਿੱਤੀ ਗਈ ਹੈ।

ਬਲੌਂਗੀ ਕਾਲੋਨੀ ਦੇ ਵਸਨੀਕਾਂ ਨਾਲ ਗੱਲ ਕਰਨ ਤੇ ਇਹ ਗੱਲ ਉਭਰ ਕੇ ਸਾਮ੍ਹਣੇ ਆਉਂਦੀ ਹੈ ਕਿ ਇਸ ਵਾਰ ਲੋਕ ਇਹ ਗੱਲ ਖੁੱਲ ਕੇ ਕਹਿਣ ਲੱਗ ਗਏ ਹਨ ਕਿ ਬਲੌਂਗੀ ਕਾਲੋਨੀ ਵਿੱਚ ਹੁਣ ਉਸੇ ਨੂੰ ਵੋਟ ਪਵੇਗੀੇ ਜੋ ਬਲੌਂਗੀ ਦੀ ਵਿਕਾਸ ਕੰਮਾਂ ਨੂੰ ਕਰਵਾਉਣ ਵਿੱਚ ਸਮਰਥ ਹੋਵੇ। ਲੋਕਾਂ ਦਾ ਇਹ ਵੀ ਕਹਿਣਾ ਹੈ ਕੀ ਬਲੌਂਗੀ ਕਾਲੋਨੀ ਵਿੱਚ ਜੋ ਵੀ ਵਿਕਾਸ ਕਾਰਜ ਦੇ ਕੰਮ ਹੋਏ ਹਨ ਉਹ ਸਹੀ ਤਰੀਕੇ ਨਾਲ ਨਹੀਂ ਕੀਤੇ ਗਏ। ਕਾਲੋਨੀ ਵਿੱਚ ਬਰਸਾਤੀ ਪਾਣੀ ਦੀ ਨਿਕਾਸੀ ਦਾ ਕੋਈ ਪੱਕਾ ਪ੍ਰਬੰਧ ਨਹੀਂ ਹੈ, ਏਕਤਾ ਕਲੋਨੀ ਦਾ ਗਲੀਆਂ ਦਾ ਕੰਮ ਹੁਣ ਤਕ ਪੂਰਾ ਨਹੀਂ ਹੋਇਆ ਜੋ ਹੋਇਆ ਅਤੇ ਉੱਥੋਂ ਦੀਆਂ ਗਲੀਆਂ ਥੋੜੇ ਸਮੇਂ ਵਿੱਚ ਧਸ ਗਈਆਂ ਹਨ। ਬਰਸਾਤ ਦੌਰਾਨ ਇੱਥੇ ਕਈ ਕਈ ਦਿਨ ਗਲੀਆਂ ਵਿੱਚ ਪਾਣੀ ਖੜਾ ਰਹਿੰਦਾ ਹੈ ਅਤੇ ਲੋਕਾਂ ਨੂੰ ਭਾਰੀ ਪਰੇਸ਼ਾਨੀ ਸਹਿਣੀ ਪੈਂਦੀ ਹੈ।

ਇਸਤੋਂ ਇਲਾਵਾ ਬਿਜਲੀ ਮੀਟਰ ਦੇ ਬਕਸੇ ਖੁਲੇ ਰਹਿਣ ਅਤੇ ਬਿਜਲੀ ਦੀ ਤਾਰਾਂ ਦੇ ਗਲੀਆਂ ਵਿੱਚ ਲਮਕਣ ਕਾਰਨ ਕਦੇ ਵੀ ਹਾਦਸੇ ਦਾ ਖਤਰਾ ਰਹਿੰਦਾ ਹੈ। ਗਲੀਆਂ ਵਿੱਚ ਘੁੰਮਦੇ ਆਵਾਰਾ ਕੁੱਤਿਆਂ ਦੀ ਸਮੱਸਿਆ ਕਾਰਨ ਵੀ ਲੋਕ ਬੁਰੀ ਤਰ੍ਹਾਂ ਪਰੇਸ਼ਾਨ ਹੁੰਦੇ ਹਨ।

ਬਲੌਂਗੀ ਕਲੋਨੀ ਦਾ ਸਰਵੇ ਕਰਨ ਤੇ ਇਹ ਗੱਲ ਸਾਮ੍ਹਣੇ ਆਉਂਦੀ ਹੈ ਕਿ ਪਿਛਲੀ ਵਾਰ ਸਰਪੰਚੀ ਦੀ ਚੋਣ ਲੜਣ ਲਈ ਉਤਰੇ ਚਾਰ ਉਮੀਦਵਾਰ ਤਾ ਪੱਕੇ ਹਨ ਹੀ, ਇਸ ਵਾਰ ਕੁੱਝ ਨਵੇਂ ਚਿਹਰੇ ਵੀ ਸਰਪੰਚ ਦੀ ਚੋਣ ਵਿੱਚ ਆਪਣੀ ਕਿਸਮਤ ਅਜਮਾਉਂਦੇ ਨਜ਼ਰ ਆਉਣਗੇ ਅਤੇ ਵੌਅਰਾਂ ਦਾ ਰੁਝਾਨ ਦੱਸਦਾ ਹੈ ਕਿ ਇਸ ਵਾਰ ਉਮੀਦਵਾਰਾਂ ਦੀਆਂ ਜਮਾਨਤਾਂ ਵੀ ਜਪਤ ਹੋਣਗੀਆਂ।